Undergraduate Thesis Batsilyer sa Edukasyong Pangsekundarya Medyor sa Filipino University of Rizal System, Rodriguez, Rizal
2014

Layunin ng pag-aaral na ito na makuha ang antas ng kahusayan sa pakikinig gamit ang tatlong dimensyon nito at kung may makabuluhang pagkakaiba sa pakikinig ng mga mag-aaral batay sa kanilang pansariling datos. Sa pag-aaral nabatid na mas nakakarami ang mga tagatugon na lalaki na may bilang na 52 na kumakatawan sa 52% kaysa sa babae na may bilang na 48 na kumakatawan sa 48% ng kabuuang bilang ng mga tagatugon. Batay sa wikang ginagamit sa tahanan, pinakamarami ang wikang Tagalog na may bilang na 90 na kumakatawan sa 90% na kabuuang bilang ng mga mag-aaral. Ayon naman sa marka sa ikaanim na antas sa asignaturang Filipino ng mga tagatugon, ang range ng mga markang 81- 85 na may bilang na 52 na kumakatawan sa 52 bahagdan ng kabuuang bilang ang nakakakuha ng pinakamataas na pwesto. Batay sa kabuuang iskor na 7.09 sa pang-unawang literal, ang mga tagatugon ay mahusay. Ayon sa kabuuang iskor na 6.03 sa interpretasyon, ang mga tagatugon ay di gaanong mahusay. Nakita din na di gaanong mahusay ang mga tagatugon sa mapanuring pakikinig dahil sa kabuuang iskor dito na 5.32.

Dahil sa pangkalahatang iskor na 6.15 sa pang-unawang literal, interpretasyon at mapanuring pakikinig, nabatid ng mga mananaliksik na ang mga tagatugon ay di gaanong mahusay sa kasanayan sa pakikinig.

Ayon sa kinalabasan ng pag-aaral na isinakatuparan ng mga mananaliksik at pagbubuod nito, nabuo ang mga sumusunod na konklusyon at mungkahi upang mapagtuunan ang kahusayan sa pakikinig ng mga mag-aaral.

Batay sa kinalabasan ng pagsusuri sa mga mag-aaral at ayon sa kanilang antas ng kahusayan sa pakikinig, natuklasan ang mga sumusunod:

Higit na nakararami ang mga tagatugon na lalaki kaysa sa babae at ang karamihan sa mga tagatugon ay wikang Tagalog ang ginagamit sa kanilang tahanan. At ayon naman sa kanilang marka sa asignaturang Filipino karamihan sa mga tagatugon ang kanilang marka ay walumput-isa hanggang walumput- lima.

Samakatuwid, ang naging resulta ng isinagawang pag-aaral ay nagpabatid sa mga mananaliksik na ang mga tagatugon ay may mahinang kahusayan sa pakikinig. Sa pag-aaral na ito natukoy ng mga mananaliksik na walang makabuluhang pagkakaiba ang antas ng kahusayan sa pakikinig ng mga mag- aaral sa Ikapitong baitang ng Burgos batay sa kanilang datos

Sa mga namumuno ng paaralan bigyang pansin ang paglinang sa kasanayan sa pakikinig ng mga mag-aaral at upang higit pa itong maiangat. Patuloy na punan ang mga pangangailangan ng mga mag-aaral tulad na lamang ng pagbabahagi ng iba't ibang materyales sa pakikinig. Sa mga guro magsagawa ng mga aktibidades o istratehiya sa pagtuturo na magbibigay motibasyon at interes sa mga mag-aaral upang kahiligan ang pakikinig. Sa mga mag-aaral bigyang halaga ang kasanayan sa pakikinig na maghahatid ng pagkatuto't pagpapahalaga sa Asignaturang Filipino at sa mga konseptong nakapaloob dito tulad ng matiming pakikinig sa pagtuturo ng guro. At sa mga mananaliksik nawa'y maging daan ang pag-aaral na ito upang masuri ang kasanayan sa pakikinig ng mga mag-aaral sa ibang antas