Undergraduate Thesis Bachelor of Secondary Education Major in Filipino
University of Rizal System, Rodriguez, Rizal
2025

Ang pananaliksik na ito, na pinamagatang "Epekto ng Teleseryeng Maria Clara at Ibarra sa Pag-unawa ng Noli Me Tangere," ay isinagawa gamit ang pinagsamang metodolohiyang quantitative at qualitative upang suriin ang epekto ng nasabing palabas sa pag-unawa ng mga mag-aaral sa nobelarng Noli Me Tangere.

Bago ang pangangalap ng datos, humingi ng pahintulot sa dekano ng Kolehiyo ng Edukasyon. Isang daang mag-aaral ang lumahok sa isinagawang survey, at labinlima ang piniling kapanayamin. Karamihan sa kanila ay may malaas na marka sa Filipino (90-100) at may interes sa panonood ng teleserye at pagbabasa

Ipinakita sa resulta ng pag-aaral na may positibong epekto ang Maria Clara at Ibarra sa pag-unawa ng mga mag-aaral sa nobela. Sa mga aspekto ng tauhan, Tagpuan, banghay, mensahe, at dayalogo, napatunayang nakatulong ito upang linawin ang mga pangyayari at damdamin ng mga tauhan, gayundin sa pag-unawa sa wikang ginamit. Bukod dito binigyang-diin ng palabas ang mga panlipunang isyu tulad ng diskriminasyon sa kababaihan, pang-aabuso ng mga prayle, at limitadong edukasyon ng mga Pilipino sa panahon ng kolonyalismo. Ipinakita rin ng mga tagatugon na ang mga karakter tulad nina Ibarra at Elias ay nagbigay-inspirasyon, habang ang emosyonal na presentasyon ng teleserye ay nakatulong sa mas malalim na pag-unawa sa akda

Batay sa mga datos, lumitaw na ang Maria Clara at Ibarra ay epektibong kasangkapan sa pagtuturo ng panitikan. Iminungkahi sa pag-aaral na gamitin ito bilang pantulong na kagamitan sa pagtuturo ng Noli Me Tangere, lalo na upang gawing mas makabuluhan at kaugnay sa kasalukuyan ang mga temang panlipunan ng nobela. Mainam ding gamitin ito sa mga kursong Filipino bilang bahagi ng estratehikong pagtuturo ng panitikan gamit ang makabagong midya. Sa huli, ipinakita ng pananaliksik na ang midya, partikular ang Maria Clara at Ibarra, ay may mahalagang papel sa pagpapalalim ng pag-unawa sa mga klasikong akdang pampanitikan at sa paghubog ng kamalayang panlipunan ng mga mag-aaral.